Wednesday, August 5, 2009

Paunang Sapak

Para sa mga nagtutulog tulugan, huwag mong antayin na buhusan pa kita ng malamig tubig para lang talagang bumangon sa iyong kinahihigaan. Isang tawag lang, magising ka na at maraming opurtunidad ang nakaabang para ay iyong sunggaban.

Para sa mga bingi at nagbibingi-bingihan, huwag ng antayin na kayo ay pitikin sa tenga para tumalsik ang anumang nakabara sa inyong mga tenga. Magkusa na kayong maglinis niyan para naman marinig ninyo ng tama ang mga sinasabi sa inyo at iyun ay inyong maintindihan. Gawan ninyo ng aksiyon ang lahat ng inyong naririnig at huwag na maghintay na lamang.

Para sa mga bulag at nagbubulag-bulagan, huwag na antayin na tusukin ko ang mga mata ninyo para matutuluyan na kayong mabulag. Kung ano nakikita ninyo na makapagbukas sa isip ninyo na tama na, sobra na, palitan na, aba eh, kumilos na kayo bago pa talaga kayo madapa.

Para sa mga nag-iemo, huwag ng antayin na batukan pa kita para lang mabago ang mood mo. Hindi lahat ng panahon ay nakaluksa ka. Hindi ka martyr. Hindi ka bayani. Hindi ka santo. Lumabas ka at hayaang masikatan ng araw at makalanghap ng sariwang hangin.

Para sa mga batugan, huwag ng antayin na kita ay tadyakan na parang kabayo. Magbanat ka naman ng buto at di mo ako katulong at lalo di ka hari na pagsilbihan. Kung akala mo na magpakahirap ako habangbuhay para sa iyo, nagkakamali ka. Pag di ka pa gumalaw diyan, bukas sisipain na kita sa buhay ko.

Para sa mga malalaki ang tiyan, huwag ng antayin na ikaw ay aking masikmuraan. Hindi iyan nakakatanggal ng bilbil. Tumakbo ka. Magpawis ka. Magdiyeta ka. Maraming gym na mura diyan. Hindi mo kailangan ang FF, Golds o Slimmers.

Para sa hibang sa pag-ibig, huwag mong antayin na susukahan kita. Hindi pag-ibig iyang nadarama mo. Katangahan iyan. Piniperahan ka na nga at binubugbog sabihin mo pang lambing iyan. Oras na upang kalimutan iyang kahibangan iyan at ayusin mo na lang ang sarili mo at maghanap na lang ng iba.

Para sa mga nagdiyos-diyosan, huwag antayin na kidlatan ka ng totoong makapangyarihan. Tama na ang pagpapapanggap at tanggapin mo na tao ka lamang. Walang kang pagkakaiba sa karamihan. Tumatae ka rin at mabaho iyun. Bumaba ka na at umapak sa lupa kung saan ka karapat-dapat.

Para sa mga gising sa katotohanan, halina at samahan ninyo akong katukin, yanigin at kalampagin ang mga natutulog, mga bingi, mga bulag, mga hibang, mga nangangarap, mga tamad at lahat ng mga praning sa mundo. Huwag natin silang hayaang manghawa at kumalat. Ibalik natin ang realidad at katotohanan na kanilang pilit na isinasantabi.

No comments:

Post a Comment